律師會前會長周永健係馬會大董之一，踏入暑假後，馬季抖暑，律師樓工作又少咗，佢一於趁暑假大搞親子活動。
周永健話，阿仔Justin依家喺英國倫敦大學攻讀法律系，每年都會返兩至三次香港同父母重聚，今個暑假佢哋計劃一家三口去歐洲玩，佢同太太胡慕芳遲啲會飛去歐洲，一家人開開心心玩番餐，事關Justin想陪媽咪耐啲喎。歐遊之後，Justin會自行搭飛機返英國繼續學業。
講起個仔，周永健話Justin十歲時，已經自己搭飛機去英國讀書，而佢又好希望個仔獨立，而且家吓搭飛機比以前方便好多，同佢當年去外國讀書嗰陣好唔同。