本文重點
舉行咗二十個年頭嘅書展已進入尾聲，好多人批評今年嘅書展畀口靚模、女藝人騎劫成功，變咗好似追星會、肉女騷咁。呢個現象引起好多人反思，今年有份出書嘅前立法會議員Mandy譚香文話，口靚模嘅潮流對作者同書商都有一定影響，希望第日有個寫真集等娛樂性書籍嘅展覽，同傳統書展區分開。有從事文化研究嘅出版人更質疑書展唔係文化盛事，而係一件唔算好事嘅「趁墟」活動。親身體會過文化沙漠嘅威力後，佢哋對書展真係別有感受。
破出公文袋嘅Mandy今年已經係第二次出書，感覺係點？佢話，今年展場大咗好多，陳列嘅書籍多咗好多，對市民本來係好事，但今年嘅焦點並唔係傳統書籍，佢雖然冇點名話口靚模嘅活動帶嚟壞影響，但就直認呢類活動改變咗原來嘅簽書活動，亦對傳統書店有衝擊，又話書展走樣好令人遺憾。
問佢同唔同意禁止口靚模、藝人嘅寫真集混淆書展視聽時，佢坦言唔可以影響言論自由、出版自由，但就建議書展有啲新花款，譬如將傳統書籍展覽同寫真集之類嘅偶像式傾銷活動分開，譬如分開兩個展覽，大家各不相干咪得囉。
為文化耕耘嘥心機
另一個曾經營書店嘅嶺南大學文化研究系兼任講師馬國明尋日都喺個電台節目度批評，認為書展出現大批品味低劣嘅口靚模寫真集，唔係以禁制手法可以扭轉嘅，反而書冇成為書展嘅主角，為文化耕耘嘅出版社亦冇得到應有嘅重視，以致有啲業者覺得參加書展係「嘥錢」、「嘥心機」同「嘥氣」嘅行動先值得重視。