八通天地線嘅SoSo姐金句一針到肉，甚麼「Lucas鬼馬又精靈，栢芝暫時唔添丁！」認真搞鬼；又如「真胸不怕洪爐火，放馬過嚟齊鍊過！」配以漫畫化之美術設計，令人笑爆嘴！之不過咁，小弟形容(口靚)模寫真之咪咪亦有金句：沒有胸便沒有天堂，堅料索爆遲早乘龍！

大家都是賣青春騷性感鬥活力，都係食呢行飯，香港啲高官點解咁掂？插極都唔死，「大花筒」可繼續戀棧下去，直到百萬約滿酬金到手；上班睇鹹網睇到雙眼滴出鹽血水嘅，市民有嘢講，好！神秘調職咯！呢啲就叫「官官相衞」。其實，大家都係(口靚)模，你話人「教壞細路」，佢嘲笑你「意識不良」，何必呢？大家應該「色色相衞」，向高官偷橋，咁就行情三級跳，唔會接騷頂爛市，只會着住比堅尼數銀紙。

亂世求生，髮可以短，胸不可以平。晚明社會風氣極端敗壞，文人凌濛初便正氣凜然：「近世承平日久，民佚志淫。一二輕薄惡少，初學拈筆，便思污蔑世界，廣摭誣造，非荒誕不足道，則褻穢不忍聞。」然而，呢位仁兄只懂責人，自己寫的《二刻拍案驚奇》，幾佔十分之一寫春藥、寫性交，不加刪節，無法公開發行。

古人已懂色情有價，今人把色情與情色來個移形換影，寫真而已，「紙為之貴，無翼飛，不脛走」，有胸，就識飛！