呢嗱，塱原濕地附近上水河上鄉過萬呎菜田幾日之內變成垃圾堆填區，明明係政府部門之間互相扯貓尾，私人土地畀人夾硬攞嚟傾倒廢物，苦主投訴又冇人理，班高官居然欺善怕惡，唔去搵出違規傾倒廢料嘅人，反而要苦主自己孭飛。

環境局副局長潘潔話，今日會發出通知書，要呢啲菜田嘅業主將土地回復原狀，唔係嘅話，當局就會提出檢控。嘩！呢鋪真係殺氣騰騰，至怕又係殺錯良民。呢個政治新貴，往日一係有問不答，一係就答非所問，呢次直頭九唔搭八玩靠嚇，話業主如果係無辜，就要盡快同當局接觸，睇吓非法傾倒係咪得到業主同意，如果唔係至繼續刮料摷人。

叮！近十個業主明明係受害人，亦係最先向政府求助嘅投訴人。試問佢哋點會同意人哋喺自己幅田度非法傾倒廢料㗎？咁樣諗邏輯上本身已經講唔通，就等於有人報警話屋企畀人打劫，警察唔去追個賊不特止，反而賴報案人自己打開門畀賊人入屋，幾乎想賴埋人哋「報假案」添，就差在冇講出口，唔使警察捉賊就最理想嘞。

邏輯混亂唔在講，副局長居然擺到明闊佬懶理，翹埋雙手等班無辜受害嘅苦主「投案自首」，好人當賊辦，簡直係荒謬之極。唔通呢位問責高官近排因為政績冇料到，畀人剷到飛起，甚至有市民要佢收皮，出現「思覺失調」，變得手足無措，語無倫次？

叮！查實呢單嘢之所以愈搞愈大鑊，完全係政府部門之間互相玩搓波遊戲造成。河上鄉畀人當垃圾堆填區嘅農地原本用嚟種菜養魚，突然間每日過百架泥頭車係咁倒廢物落去，短短三日之內變晒樣，農地被七至八呎高嘅泥石冚晒，果樹、蔬菜甚至農屋都被夷為平地，驟眼望落去好似經歷過火山爆發咁款。

有苦主先後向警方、環境保護署、規劃署同地政處求助，結果畀呢啲部門用「搜集證據同需時調查」為理由一拖再拖，但冇人話畀佢哋知可以點做，苦主更因為擔心會畀規劃署檢控，無啦啦嚇餐懵。

最離譜就係，有村民發現，部分非法傾倒嘅廢物更加涉嫌來自建築署嘅政府工程。所以話，政府心入面其實好清楚「元兇」另有其人，但係就唔肯去追查，直到今時今日仲諗住將責任卸晒畀業主就算數，逼佢哋硬啃！唔通家陣做官嘅真係咁惡，唔使問責，可以任「砸」，玩埋大石砸死蟹？叮！