港區全國人大會定期考察內地，最近一班港區代表去咗山西考察，其中一個考察項目係世界馳名嘅山西五台山，成員Bernard陳智思尋日提早離隊返香港開會，佢話五台山有好多嘢睇，令佢大開眼界。不過，Bernard都有啲心底話，認為五台山係佛教兼文化聖地，富有歷史價值，可惜好多地方都畀人商業化氣氛太濃嘅感覺，最弊嘅係呢個現象喺國內好多旅遊設施都有，佢忍唔住嗌港人北上幫手包裝一下。
Bernard唔肯詳細講商業化嘅批評，不過港人去內地時大都面對層層關卡收錢、處處設限搵水嘅情況，如果將文化同宗教景區搞得太商業化，只會破壞千年歷史結晶。難怪Bernard叫香港人不妨多啲返大陸，幫手諗吓點樣將啲景點再包裝。
講番五台山之行，佢話五台山、平遙古城同常家莊園等山西必到景點都好正，未去之前佢都唔知山西有咁多嘢睇，尤其係常家莊園，係中國民間最大嘅私家莊園，而被列入《世界文化遺產名錄》嘅五台山都不可錯過。