澳門第三屆行政長官選舉呢個禮拜日就會喺澳門蛋舉行，唯一候選人崔世安尋日同澳門建築商界會面時重申，推動公共房屋政策係佢上任後首要排序處理嘅事項，承諾會盡快啟動程序，等五千八百個輪候上樓嘅低收入家庭可獲分配社會房屋，同以租金補貼作為佢哋上樓前嘅過渡安排，又考慮以公開抽籤形式，讓已通過經濟審查的輪候人士得到經濟房屋單位。
澳門特首選舉競選宣傳期聽日午夜結束，崔世安尋日接連出席多項活動，傍晚會見教育團體、夜晚則出席最後一場公聽會。
崔世安又話，公屋政策原意係幫助有需要幫嘅人士，但同時應建立公屋政策嘅規範同機制，避免經濟房屋淪為投資謀利工具。
對於業界提出行業認證同分級制、完善建築條例同行業法例、平衡公共工程同私人工程發展，以及支援建築界人才參與本地建設等，崔世安都表示意見十分之可取，日後會予以考慮。