本文重點
五百年來最長時間嘅日全食吸引好多香港人北上，立法會保險界嘅陳健波同旅遊界嘅謝偉俊（Paul）分別去武漢同黃山觀賞「天狗食日」。陳健波話今次同太太囝囝一齊去武漢荊州荊門市五里鎮劉集村觀看，阿Paul則同太太白姐姐參加香港入境團旅行社協會舉辦嘅「黃山、杭州、千島湖考察團」，兩人仲發現異象添。
陳健波話有天文好友計到劉集村係最佳觀賞地，當地據講亦係三國時代劉備落過腳嘅地方，只係四周都係荒蕪田野，到「食甚」（太陽全被遮蓋）時，陳健波留意到牛隻停止食草，抬頭周圍望，雞隻就咯咯聲周圍走，只有豬繼續懶洋洋。
百鳥歸巢 青蛙跳出嚟
阿Paul同白姐姐就喺黃山山腳嘅酒店門外安裝攝錄機拍攝日全食，佢哋就發現百鳥歸巢，而青蛙同昆蟲就跳晒出嚟，十足拍戲一樣。