創作人大都各有喜好，憑《向左走．向右走》紅遍中港台嘅台灣繪本作家幾米尋日嚟港，仲喺書展搞咗個簽名會添。講到佢創作嘅習慣時，幾米披露佢多數聽流行曲同古典音樂，最常聽嘅竟然係香港歌手陳奕迅嘅歌，事關佢囡囡都係陳奕迅迷喎，而台灣歌手張惠妹亦係佢靈感泉源。
多留意身邊發生嘅事
幾米話，佢一般好少喺十二歲嘅囡囡身上搵創作靈感，反而會多啲留意身邊發生嘅事，或者睇多啲新聞同電影，畫番啲自己有興趣嘅題目。
幾米居於台北，廣東話應該麻麻，竟然會鍾意陳奕迅嘅歌都可算特別。佢仲話，唔係太了解香港嘅繪本發展，只係喺朋友口中得知香港繪本嘅製作好認真，佢相信香港繪本會愈做愈好。幾米呢幾句話，都算好客套囉！
