本文重點
踏入二十個年頭嘅書展尋日開幕，會展中心到處都係文化人、名氣人、專業界。一向最叻抽水嘅煲呔曾都急急腳走去攞彩，仲以皇帝出巡嘅姿態喺書展行咗一轉，不過，佢身邊嗰十幾二十個跟班，再加上採訪嘅傳媒，搞到佢嘅親民騷變成擾民騷，有書商被推跌書，亦有書商做唔到生意，被佢出巡氣勢嚇得走避嘅市民更深有不滿，「唓」聲陣陣。
煲呔曾尋日先為會展擴建部分主持啟用儀式，之後就去書展巡視，行程本來兼備中英書種，焦點又不離同內地相關嘅書店同書籍，但係佢哋一行人去到邊，就喺書展入面捲起一陣龍捲風，搞到現場又逼又狹。
累新書冧架當冇嘢
行書展時，煲呔曾都掏荷包買咗兩本同保育有關嘅書，一本係海洋公園熊貓基金負責人陳晴寫嘅《兩晴相悅》，另一本係劉斯傑寫嘅《香港彈起》。前者嘅主題係生物保育，係陳晴以佢收養嘅熊貓作題材嘅寫嘅書，佢希望今次出書能夠為熊貓基金籌款。至於第二本書則講香港嘅建築風格，由早年嘅徙置區到板間房，甚至公屋、洋樓等，全書以立體編印。
不過，煲呔曾喺場內消費三百幾蚊，已搞到書展入面人仰馬翻，一行人去到邊塞到邊，期間更推冧一疊書，煲呔曾眼見自己累到新書冧架，但就手指尾都冇郁過，完全無意幫參展商執書；喺書攤時佢又要四圍同人傾偈，附近嘅書商喺大堆人圍堵下，根本做唔到生意。
佢喺會場大概停留咗半個鐘，由於呢群人聲勢太大，嚇到唔少睇書買書嘅市民爭相走避，有人以為明星駕到，亦有人睇清楚係煲呔曾巡場時，忍唔住大「唓」一聲，憤憤不平咁埋怨佢擾民。