睇睇先，教育局副秘書長黃偉綸出任政府新聞處處長；食物及衞生局副秘書長聶德權頂咗退休嘅余志穩做社會福利署署長；仲有康樂及文化事務署署長周達明會升官發財做發展局常任秘書長。咪住，唔係啩，康文署署長周達明居然可以紮職做發展局常任秘書長？

原來珍珠都冇咁真呀！公務員事務局局長俞宗怡表示，任命嘅官員全部都係資深政務官，擁有豐富公共行政經驗，仲有出色嘅領導同埋管理才能。

俞宗怡講嘅未嘗冇道理，周達明的而且確係一個好資深嘅政務官，佢三日唔埋兩日就孭隻鑊。人稱「周一鑊」嘅食物及衞生局局長周一嶽冇錯都有大把鑊孭喺身，但佢係問責局長唔算數，如果講「資深孭鑊政務官」咯喎，周達明都算係數一數二(口架)嘞。

至於話佢嘅公共行政經驗豐富，未必好多人認同，如果話佢嘅「卸膊行政經驗」豐富，肯定冇人反對。唔係咩？睇吓香港啲大樹失驚無神冧一棵落嚟，壓爛的士已經算係小事，去年之嘛，就有一個十九歲港大女生喺赤柱畀樹壓死。

草木有情都未必想殺人，弊在有個無情嘅周達明喺度，平時對蟲蟻侵蝕樹木闊佬懶理，白蟻咬到空晒心，有乜辦法唔冧吖。但佢劑劑都可以置身事外，唔係踢個波畀其他部門，就話經過檢查冇問題，搞到啲樹木好似計時炸彈，市民喺下面行過都心驚膽跳！

講到出色嘅領導同埋管理才能，周達明肯定當之無愧啦。佢嘅管理哲學就係乜都外判，好似話依家將救生員工作外判出去就關人個關，港島東游泳池當值救生員唔夠咩？易搞啦，求其搵個冇拯溺同救護資格嘅收費處職員頂住先，如果咁啱有泳客遇溺，咁就你死你事咯！

話時話，如果喺一般私人公司，周達明呢啲咁嘅「人才」一早炒咗九世啦。鬼叫佢條命生得正，可以撈到份政府工，家陣佢唔止冇事冇幹，仲紮職做常秘添，真係冇天理呀！

講到冇天理，又何止得周達明呢單吖，乜大家唔知特區政府不嬲都係官官相護、賞惡罰善嘅咩？幾個月前環保署咪爆咗單醜聞嘅，有個高官明知有電腦監察系統都一於少理，返工大半時間睇鹹網。

記得當局嗰時話會嚴肅處理呢個鹹官，到底結果係點呢？原來所謂「嚴肅處理」，就係唔聲唔聲調職就算。最離譜嘅係，環保署同埋公務員事務局好似夾埋扮啞咁，一直唔講呢個高官調職嘅原因。

所以呢，周達明只不過管邊瓣衰邊瓣，又冇煲鹹網，所以公務員事務局對佢嘅「嚴肅處理」，咪就係升職囉。比起周一嶽局長醫療事故一單接一單，仲可以拎埋個金紫荊星章添，已經算賞得少啦！

計太一叮話齋，周達明唔使氣餒(口架)，喺發展局常任秘書長呢個新崗位繼續渾渾噩噩，下次大紫荊實有份呀！