早前幫班議員考勤，立法會體育、演藝、文化及出版界代表霍震霆，不論喺立法會大會定係事務委員會嘅出席率都偏低。立法會工商事務委員會尋日召開今個立法年度最後一次會議，霍公子喺呢個委員會嘅出席率得百分之十二，係咁多個委員之中最低嘅一個，但佢罕有地現身會議，搞到啲同僚好驚訝。
委員會主席方剛一見到佢，就笑住問坐喺隔籬嘅副主席「象哥」黃定光：「今日乜嘢事？」象哥都忍唔住揶揄：「阿Tim少（霍震霆英文名叫Timothy）真係好頭好尾。」但霍公子一於懶理同僚嘅冷嘲熱諷，只係埋首細閱開會嘅文件。
之不過，霍公子喺會議開始咗十分鐘都唔夠，就離開會議室聽電話，見佢枱面啲文件都冇攞走，以為佢好快就會返嚟，點知兩個多鐘頭嘅會議結束，都冇再見過佢嘅身影，反而佢嘅助手就聽足全程。