馬會以四千一百多萬元認捐咗大禮堂、多用途禮堂同展覽館，新鴻基地產同恒基地產亦分別捐出五百萬元，命名兩間行政辦公室，捐出三百萬元嘅「玩具大王」蔡志明，休息室就用佢個大名命名，而發叔以三百萬元認捐圖書館，發叔又透露，新世界中國主席鄭家純初步答允捐出五百萬元，但未諗到畀邊項設施佢。但最貴嘅中庭同其他多項設施，仍有待善長認頭。

中庭命名值一千萬元，之所以咁貴，除面積大外，旁邊仲有發叔銅像坐鎮，而三層中庭走廊，每條二百萬元、食堂同廚房各三百八十萬元、二樓露台二百萬元等，所有設施命名總值二億元，遠超工程費一億三千多萬元，但有局中人仍建議倣效志蓮淨苑推行一磚一瓦命名計劃，簡直係乜都唔放過。