《珠三角洲改革發展規劃綱要》尋日舉行交流會，廣州市副市長陳明德就話，廣州市近年好注重環保，所以港商要喺內地投資，就一定要守環保規則。有份出席交流會嘅建築、測量及都市規劃界立法會議員劉秀成都忍唔住話：「佢講得真係好，局長真係要聽吓！」但係就冇講明係邊位局長。
劉秀成話人哋講得出做得到，所有政策都以環保行先。但一講番香港嘅現況，佢就火都嚟埋，話：「膠袋稅搞咁耐先收，連特首都畀人話係氣候逃犯！」
佢咁講根本係兜個圈嚟鬧煲呔曾，而畀佢唔點名批評嘅環境局局長邱騰華更加冇出現，但佢嘅副局長潘潔就聽足全程。潘潔回應劉秀成嘅批評時，仲喺度繼續背書咁。唉！簡直嘥氣。