劉燕卿去到超市買零食時，特別留意營養標籤，又專吼減價貨出手，盡顯師奶慳家本色，但原來佢亦有失手時，而買錯嘅唔係濕碎嘢，而係大拿拿幾百萬元嘅樓。

話說佢年前睇中一個千七呎筍盤，入到屋就畀窗外嘅大樹美景深深吸引，於是扑錘買下，殊不知住落先知大樹阻擋唔少陽光，令屋內變得較陰暗，嗰刻真係覺得做錯決定，好彩後來物色到另一間心水屋，將舊屋賣咗甩身，所以佢奉勸大家，睇樓要揀唔同時間，細心望清楚屋內外，最好帶埋家人幫眼喎。