早前金勞詹向行政會議召集人CY梁振英教路，反而基本法委員委員劉迺強尋日提起CY就表現得好疏離，佢早前發起「香港再出發」宣言，CY係聯署人之一，佢哋嘅關係唔似咁淺喎。
劉迺強唔肯評論CY勝算，只係話ＣＹ要跑出「仲爭好多嘢」，包括選票，講咗等如冇講！扭咗佢一輪，佢終於忍唔住話有人指CY形象唔好，但形象嘅嘢好快可扭轉劣勢，全國人大常委范麗泰係好例子，又話CY同潛在對手唐唐，北京都可以接受，手板係肉，手背又係肉，中央唔偏袒，反而見CY出嚟爭，北京會高興，因可提高未來特首嘅認受性喎。
咁有冇教CY幾招呀？佢話冇，亦點都唔肯即場過幾招畀記者，話：「講咗出嚟，CY咪唔請我食飯！」
