按照以往慣例，風之后李麗珊贏咗奧運金牌返嚟，政府話要大力發展滑浪風帆；李靜同高禮澤喺奧運奪取銀牌咩，當局又話要狂谷乒乓球運動。但劑劑都係虎頭蛇尾，最後不了了之。所以當特區政府遲啲話要投放大量資源訓練游泳明日之星，仲拍晒心口要將香港打造成一個「游水港」嘅時候，小朋友千祈唔好上當，以為游水可以游出個未來呀！

唔知大家對香港女飛魚施幸余有冇些少印象呢？佢出道冇耐就勢如破竹橫掃大小游泳賽金牌，打破香港紀錄更加係當飯食。最厲害係喺○五年嘅泰國首屆亞洲室內運動會中，佢個人狂掃七面金牌，嗰時真係威到盡。

當施幸余奪獎無數嘅時候，港隊將佢列為精英甲級運動員，確係幾風光(口架)。但咁又點吖，到咗成績慢慢滑落，咁就唔同講法，港府當堂打完齋唔要和尚，立即將佢由精英甲級運動員下調去乙級，資助減咗近一半有多。冇計啦，呢啲咪叫做「飛鳥盡，良弓藏」囉，港府係咁現實㗎啦。

事實上，好多外國選手幾乎衣食住行都係國家包辦，運動員可以疊埋心水專心訓練。之但係香港運動員就同人唔同命咯，話就話係精英運動員，但每個月只得雞碎咁多資助，以亞洲排名第一攀登運動好手黎志偉為例吖，每月只係得八千元咋，叮，連跟車送貨都不如呀！

好嘞，就算出去外國比賽，以為佢哋可以周遊列國好風光啦，殊不知背後一殼眼淚，食宿費原來唔包，次次出外國比賽要倒貼幾千元至得。要抬埋錢去做精英運動員，做唔做都罷啦！

叮佢個鎯鎯，特區政府把口就話重視發展體育，查實完全係得個講字。睇吓籌備多時嘅東亞運動會就快開波，人搞東亞運，香港搞東亞運，唔知點解特別寒酸。澳門早幾年主辦東亞運總開支四十億，但港府總預算得嗰二億幾，仲係政府只出一半，其餘靠集資，甚至要同有求必應嘅黃大仙度水，認真丟架。

所以呢，被視為測試年底東亞運動會舉辦能力嘅全港運動會，咪即刻出晒洋相甩晒轆囉。幾場大雨之嘛，場地積水處處，室內場仲擺埋膠桶陣。到時東亞運全世界觀眾睇直播，見到幾個精英運動員跣到攤攤腰，寫包單肯定成為國際笑柄啦。

計太一叮話齋，正如李麗珊所講，香港運動員並唔係垃圾，弊在有個沉香當爛柴嘅政府唔識寶，將精英運動員當係草啫！唉，香港運動員，認命啦！