中國病理學先驅侯寶璋過咗身三十幾年，但佢嘅貢獻延續到依家。尋日侯寶璋家人幫佢出咗本《侯寶璋家族史》，仲喺佢做過系主任嘅香港大學搞新書發布會，而嚟撐場嘅行政會議成員「金刀梁」梁智鴻（圖）就係侯寶璋嘅徒弟。
咦！金刀梁專長係泌尿科，同病理學有乜關係呢？原來佢係侯教授最後一班教嘅學生，本來佢都係想讀病理學，恩師一番說話，就改變咗佢以後嘅路向。
話說有次上堂，侯教授要金刀梁用顯微鏡搵一個有問題嘅細胞，但佢搵極都搵唔到，教授幫佢搵番個細胞先叫佢睇，點知佢仲係睇唔到！當時教授慨嘆一句：「你都係唔適合讀病理學㗎喇！」然後過咗幾日，教授又搵佢幫手做解剖，見佢一搵就搵到需要嘅內臟，再講多次病理學唔啱佢讀！雖然嗰刻有啲唔開心，但就令佢反思自己嘅出路，終於喺泌尿科取得驕人成績。