青馬大橋、國際金融中心同赤鱲角機場等地標式建築物，全球知名，喺行內多年嘅香港建造商會會長黃天祥都話香港建築業喺國際極具地位，唔少外國公司起新總部時都會來港取經，更有外國公司要求喺當地「倒模」興建一模一樣嘅建築物做辦公室。
正如杜拜好多金碧輝煌嘅地標式建築物，香港建築公司都有份參與興建，但當地有啲嘢都難倒香港建築師。係乜？咪就係當地工人囉！大家唔好緊張，唔關工潮或者罷工問題事，而係當地發展要嚴守「清規」，因為杜拜係回教地區，當地人民大部分係虔誠回教徒，每日祈禱五次，期間會停工，而且每個禮拜五都要放假做禮拜。
聽佢咁講，好可能會拖慢工程進度，但又要尊重人家嘅宗教信仰，咁真係幾惡搞喎。
卒之畀佢諗咗條好橋，就係除咗聘請當地工人之外，仲請多啲唔同國籍嘅工人，信仰唔同，就唔會同日放假啦，咁就可以當補漏，工可以日日開，仲可以促進種族融和添！