二十三位泛民議員逢禮拜五會開飯盒會商議事情，建制派內好多都係商界代表、專業人士，食唔慣飯盒，所以上禮拜四去咗中環開餐，而呢次武林大會嘅主菜亦有聲有色，就係每人發言三分鐘，講吓過去一年議會生涯嘅感受。

據講，出席嘅有二十五人，建仔、富貴黨、專業會議、五散人、經濟動力同工聯會都有代表，人人都有發言，變咗宣泄怨氣嘅申訴大會，對議會內愈嚟愈多掟蕉、講粗口呢類粗暴行為大表不滿，有啲仲嫌立法會主席主持會議唔夠強硬。

聽「金勞詹」詹培忠尋日講，呢次建制派嘅武林大會係佢九一年入立法局以嚟嘅首次，由建仔埋單請客，佢就出咗十支紅酒。佢話大家對呢種交流活動好受落，打算好似泛民飯盒會咁定期聚一聚，例如一月一大搞，一周一小搞。但問到武林大會召集人建仔主席，佢就唔敢講到咁實，話睇情況啦，未有既定計劃。

新面孔對政府有怨氣

建仔失驚無神請食飯，梗係事有蹺蹊啦。知情者透露，立法會上年十月復會以嚟，建制派多咗一批新面孔，好似金勞詹、謝偉俊、葉劉淑儀同五散人咁，佢哋嘅共通點係對煲呔曾政府頗有怨氣，投票立場冇路捉，好似成立調查雷曼事件專責委員會一役，已經玩謝政府。

老實講，三十五個人梗有一個鬼頭仔喺左近，建制派有乜怨氣，肯定好快傳到西環耳邊，然後好快有人嚟安撫佢哋。建仔揀喺呢個時候出手，亦係諗過度過，年底政改一役勢所難免，如果建制派仲係個個當自己係自由人、散沙一盤嘅話，咁點同泛民玩呀？梗係要趁早吹雞，叫啲自由人聽話歸隊，箍緊呢三十六張票啦！