記唔記得幾個月前曝光嗰單環保署「鹹網高官」醜聞吖？畀電腦監察系統「（目及）」到喺辦公室狂睇鹹網嘅環保署助理署長，原來已經靜靜雞調咗去其他部門。當局當初話會嚴肅處理，到頭嚟調職當「懲處」，咁都未夠離譜，環保署同公務員事務局回應查詢時，居然齊齊玩封嘴，一個唔肯講呢個高官調職嘅原因；另一個就拒絕透露有冇對佢進行紀律聆訊，亦唔肯交代聆訊結果同懲處方式。

喂，家陣唔係寫錯隻字、寄錯封信咁簡單噃。身為首長級官員，返工有正經嘢唔做，一半時間睇鹹網，大起癮上嚟一日睇足六粒鐘，如果喺私人機構，一早畀人炒咗啦。呢位高官月薪成十二萬，「高薪養廉」變咗「高薪養鹹蟲」，你話納稅人唔就假！

叮！呢單嘢證據確鑿，民憤極大，影響極壞，納稅人有權知道政府到底作出乜嘢處分，當局一句「調職」就算數，仲有冇兒戲啲吖？請問公務員事務局局長俞宗怡，唔通呢啲就叫「增加公務員運作透明度」？

冇計啦，政府一向都係黑箱作業，賞罰不明㗎嘞。每次出事，例牌係高高舉起，輕輕放下，呢次鹹網醜聞又係咁，官官相護嘅惡習好似毒瘤發展成癌症晚期咁，已經無可救藥。你話咁嘅政府，市民仲點會信吖！

好似引起港人共憤嘅梁展文事件咁，佢退休前係房屋及規劃地政局常任秘書長，曾參與處理紅灣半島事件，喺退休後管制期內出任同地產業務有關嘅私人財團高職，政府竟然連最起碼嘅警覺性都冇，唔諗吓市民對利益輸送同官商勾結嘅疑慮，唔顧及市民觀感就批准梁展文嘅任職申請，卒之搞到民怨沸騰。

為咗平息民怨，政府焗住搞咗個「首長級公務員離職就業檢討委員會」，提出所謂二十幾項建議，其實換湯不換藥，延長管制期只係掩人耳目，表面上收緊咗，實際上根本阻止唔到高官攞完退休金，又到私人機構搵真銀，更無法消除市民嘅疑慮。

講開官官相護，不可不提前房屋署署長苗學禮，呢位洋高官當年涉及短樁醜聞，成為過街老鼠，立法會甚至通過對佢嘅不信任動議，但佢冇受到處罰不特止，仲被派去瑞士日內瓦做香港駐世貿常設代表，享受湖光山色，因禍得福添。所以話，做官犯錯，使乜驚噃。

咦，諗落真係要查一查香港駐外辦事處官員花名冊，睇吓「鹹網高官」係咪轉咗份筍工，話唔定佢正喺歐洲某個城市嘅紅燈區幫港府做緊「市場調查」。咁就真係「求淫得淫」，寓工作於娛樂咯。叮！