立法會已開始抖暑，但手尾就多籮籮，繼新世界官司同政府或有訴訟費爭拗後，議員李鳳英早排喺樓梯跌親、搞到入院醫治多時亦起爭拗，事關英姐嘅醫藥費至今累積估計超過二十萬元，但立法會又冇幫議員買勞工保險，呢筆醫療費邊個畀，政府同議會各執一詞。
英姐跌親後，立法會已解釋話由於議員喺法律上唔算係僱員，所以唔受勞工保險保障，最多只可以申領每年二萬幾蚊嘅議員實報實銷醫療津貼。據聞政府同立法會信來信往傾過幾次，初步認為英姐雖然叉錯腳，但議會亦非冇責任，因為樓梯扶手係八十年代嘅產物，只有一邊扶手，唔符合現行建築物條例要求，如果英姐告上法庭有機會勝訴，賠償肯定唔止二十萬添，幫佢支付醫藥費和解仲有着數。
不過，立法會認為大樓建築由建築署負責，唔應該由身為租客嘅立法會畀錢。政府就質疑立法會唔係純粹租客，而係大樓嘅實質管理人，況且立法會依家水浸，有一億四千萬元儲備，冇理由要政府全部孭晒。