青少年濫毒問題惡化，政府又提唔出乜嘢措施，搞到十八區區議會要自救，觀塘區議會主席陳振彬（Bunny）早喺年前已搞緊個活動，仲搵嚟前警務處長李明逵幫手做顧問，前警務處副處長馮兆元更會出山幫手執教鞭。
Bunny話，佢哋早喺一年前已察覺青少年吸毒情況趨嚴重，去年成功獲政府批出位於鰂魚涌英皇道培志男童院舊址，經過大半年改裝工程，男童院已變身成一所有住宿功能嘅德育培訓中心。呢個中心最多可容納四十人住宿，有沖涼房、廚房、課室、操場同繩網等。整項裝修費約為一千萬元，培訓中心將於下月開始試運，初步試辦為期兩日一夜嘅德育培訓營。
入營學生每日要步操兩小時，學習紀律，而一日三餐都要學生親自下廚，從而學習獨立。Bunny仲計劃搵專人教導家長觀察仔女嘅日常習慣，例如發現仔女經常袋住支裝薄荷膏或切斷咗嘅汽水飲管就要小心，因為吸毒者經常感到鼻塞乾涸，薄荷膏有助紓緩，而飲管就係吸食毒品嘅工具。