政府高官成日都要去立法會接受議員質詢，好多人都練定兜圈、遊花園嘅技巧，近期一眾副局長、政治助理畀人鬧表現差，顯示呢啲問責官員始終唔熟書同冇急才。民政事務局副局長許曉暉（Florence）尋日出席一個活動時，就透露佢成日都要接受急才嘅挑戰，作古仔滿足囡囡嘅好奇心。
尋日有團體舉辦一個故事創作活動，Florence應邀做頒獎嘉賓，並即場講故事，事後透露經常講故事畀囡囡聽，佢話出任問責官員後照顧家人嘅時間愈嚟愈少，因為自己夜晚放工返到屋企，年幼嘅囡囡已經入睡，所以佢要一早起身講古仔。
初時，Florence只係同女兒講吓《格林童話》、《伊索寓言》嘅故事，但四歲嘅囡囡Serene漸漸有主見，鍾意聽即興古仔，有時攞起個火車頭，就畀兩個火車頭名同地方名，要佢講火車頭嘅古仔，搞到Florence經常要作古仔氹囡囡。日積月累下，呢個副局長媽咪大有機會做「作古王」喎！
書展將至，Florence透露，過去都會帶囡囡行吓書展、睇吓兒童書籍，平時更鍾意去圖書館，等囡囡自己揀鍾意嘅書籍，養成閱讀嘅習慣。