立法會旅遊界代表謝偉俊（Paul）自上任以嚟，就一直盯實旅遊業議會，一時要求取消旅議會，一時又批評佢哋嘅運作，日前仲喺立法會動議要求政府檢討旅議會嘅運作。成功通過議案後，佢即刻廣發一份名為《俊報》嘅特訊，話旅議會即將面對二十一年嚟首次全面檢討，情況就好似旅發局同平機會被審計署查咁樣。
阿Paul同旅議會有牙齒印係人都知，由佢喺立法會選舉中擊敗旅議會支持嘅總幹事董耀中開始，雙方嘅關係就好緊張，今次立法會名義上通過咗個動議，但旅遊事務署只係承諾去檢討，範圍有幾大、集中邊方面暫時都冇人知，而且旅議會同用公帑運作嘅審計署監察機構有分別，所謂檢討未必會好似審計署嗰種衡工量值式徹查行政同使費噃。
審計署對當年旅發局同平機會嘅批評都係指佢哋大花筒兼行政混亂無方，阿Paul專登將旅議會同呢兩個機構拉埋嚟講，都可算別有用心，亦可見狙擊之心真係不到黃河心不死。