匯賢智庫尋日舉行三周年籌款晚宴，理事會主席兼立法會議員葉劉淑儀以一身Armani套裝出席，順道幫海洋公園主席盛智文慶祝生日。葉劉自爆為咗個晚宴，佢已兩手準備，預備定另一套Armani，若果真係出現女士們最忌嘅撞衫場面，就可以即時更換喎。
雖然尋晚高掛三號風球，場面都很熱鬧，連久違嘅前環境運輸及工務局局長廖秀冬都現身捧場。葉劉介紹嘉賓嘅時候就好誇張咁話，見到大家一雙一對赴會，真係連空氣中都瀰漫住愛情喎！原來立法會主席同埋涂謹申都帶埋女友出席，場面好溫馨。
跟住葉劉拉埋壽星仔扮嘢文上台切蛋糕，仲話扮嘢文今年二十六歲喎！尋晚幫手做司儀嘅葉劉囡囡葉榮欣（Cynthia）隨即送上一盒寫上「The Bad Boy's birthday（壞孩子的生日）」嘅生日禮物畀扮嘢文，呢兩母女似乎夾定玩人。