Mandy早前話，佢本《那些，我沒談過的事》將會爆大鑊，重提○五年政改方案表決前夕，有位泛民專業人士同特首代表見面時，表明會支持政改方案，但後來畀盟友鬧到反艇先至轉軚。呢番話一出街，即刻有人對號入座，公文袋一個大狀都擒擒青出嚟澄清，又警告Mandy咪亂寫，否則唔排除採取法律手段。

正當大家翹首以待Mandy點樣爆料時，佢本新書卻作另類處理，尋日大家翻看有關章節，只見呢一部分竟然被塗黑咗，問起Mandy點解會咁時，佢慨嘆有口難言。乜泛民唔係捍衞言論自由嘅咩？佢解釋，為免有人對號入座有所行動，亦想新書成功出版，惟有塗黑有關內容。

泛民內訌愈演愈烈

有口痕友話，咁講似乎係Mandy一度想堅持佢所謂嘅「寫歷史」，所以呢本書製作前期一直保留相關情節，但到後期喺出唔出書嘅壓力下，最終都要屈服，但又要話畀人聽，佢有寫到，所以咪塗黑佢囉。呢個「書中黑幕」嘅安排都可算絕，諗起幕後嘅嘢，同埋始作俑者就係平時嗌言論自由最大聲嘅人，就更令人眼前一黑。

今次Mandy有所保留嘅屈服，顯示泛民內訌愈演愈烈，佢同公文袋嘅嫌隙咁深，遲啲可能仲有大把戲睇，大家拭目以待啦！