立法會政府帳目委員會早排直斥平機會行政混亂同濫用公帑，帳委會副主席陳茂波用「匪夷所思」四個字形容呢啲法定及公營機構嘅大花筒行為。佢話要寫信畀煲呔曾，要求呢啲機構就企業管治定期「自行驗身」，仲要求政府加強監管，咪等醜聞爆完一鑊又一鑊。

公營機構由納稅人供養，梗係唔能夠畀佢哋亂嚟啦。之但係，香港乜都唔多，公營機構最多，數數埋埋有成七十幾個咁多，審計署一年至審得嗰三幾個，全部審一次要成二十年，審得嚟，多多公帑都唔夠班大花筒Fing啦。叫佢哋自己「照肺」，更加嘥氣，公營機構衰嘢、醜嘢一籮籮，而且好多都涉及管理層損公自肥，冚都嚟唔切，邊可能主動認衰吖。呢嗱，平機會主席鄧爾邦就係其中嘅人辦嘞。

鄧爾邦嘅醜聞成匹布咁長，當年佢一坐上主席個位就帶晒成班高層外訪，搞到平機會管理真空亂晒龍；跟手又有「商務客位」同「大使套房」風波、擅自以公帑購買「超豪」人壽保險等等。而講到管理更加唔掂，佢做咗咁多年，平機會濫用公帑嘅醜聞就爆足咁多年！

不過，鄧爾邦面皮仲厚過犀牛皮，面對要佢引咎辭職嘅呼聲，佢好似借咗聾耳陳隻耳咁，當聽唔到。原來，佢賴死唔走唔係因為「離開好簡單、留低好困難」，而係死都要撐到明年一月合約屆滿，可以攞過百萬約滿酬金。為咗攞着數，佢仲有乜嘢做唔出吖？

審計署話佢唔稱職，立法會仲開到聲話「極度遺憾」添，不過呢啲都係無牙老虎，權力所限，咬鄧爾邦唔入。至弊請鄧爾邦返嚟嘅政府好似怕咗佢咁，任佢為所欲為，令平機會冇晒公信力，政府冇晒威信。

公營機構使嘅係公帑，政府監管責無旁貸，最弊政府連自己都顧唔掂，要佢哋睇住啲公營機構，嘥鬼氣啦。香港豆腐膶咁大，得幾百萬人，居然有七十幾間公營機構，你話係咪疊床架屋，搵納稅人笨吖。

其實，呢啲機構好多都係港英殖民政府留低嘅，例如平機會及私隱專員公署，好聽啲叫「政治花瓶」，其實係「政治地雷」。佢哋唔單止不務正業，至叻就係以權謀私，前副私隱專員林永康呃旅費被判入獄；前私隱專員劉嘉敏食相仲難睇，離職前連公署嘅傢俬都「平價」收購，搬埋返屋企，真係要幾羞家有幾羞家。

計太一叮話齋，好似平機會、私隱專員公署呢啲機構，正一醫番都嘥藥費，連「自行驗身」都唔使，最好即刻摺咗佢，慳番啲公帑，一了百了。叮！