「黑英」林超英退休後，近排有新搞作，原來佢去咗香港普通話研習社幫手，成為理事會主席，除咗做吓啲日常嘅行政管理工作，間唔中仲會兼任導師教幾堂「煲冬瓜」，而且唔收錢添！黑英話當年，指天文台係除政務官職系外，第一個引入煲冬瓜班嘅政府部門。
煲冬瓜叻到可以開班授徒，黑英其實都下過一番苦功。點學？佢用好純正嘅煲冬瓜講：「啃字典！」讀咗字典幾年，終於練成一口流利煲冬瓜。
除咗識教語文，佢仲識教人點做人。佢透露久唔久就返母校港大同班師弟妹交流吓，仲成日勉勵依家啲大學生，千祈唔好當自己仲係讀緊中學，乜都等人幫、等人教，反而應該學識點樣自我啟發，要保持番啲熱情同激情喎！
