為梁展文事件聆訊，立法會將會同新世界中國對簿公堂，錢銀問題肯定係頭痕事，立法會主席前日話會要求訴訟費由公帑支付。據了解，主席事後打過電話畀煲呔曾申述立場，而煲呔曾表現客氣，話會全力支持立法會，但講到錢銀就表明既然立法會有一億四千萬元儲備，不如訴訟費「立法會出啲，政府出啲啦」，但就冇講清楚承擔比例，而立法會主席當時也冇回應。
梗係啦，要政府全數承擔訴訟費，係各政黨代表開完行政管理委員會後嘅一致決定，邊個夠膽擅自推翻？不過，特首辦發言人尋日對我哋話，政府仲係希望立法會先調撥其現有資源或儲備去應付今次訴訟嘅開支，如果立法會需要額外資源，政府願意積極協助。
咁講法，立法會同政府仲係各執一詞，結果可能係雙方共同分擔訴訟費，亦可能係由立法會先墊支，再由政府支付，仲可能由政府直接支付，睇嚟立法會主席同秘書長吳文華要同政府繼續拗數，唔知煲呔曾想點埋尾呢？