好似民政事務總署署長陳甘美華咁，舊年年底先放完一個月大假，呢兩個月又分三個階段放假。政府憲報尋日跟手公布，官場「肥師奶」、民政事務局常秘尤曾家麗會喺下禮拜二起放假。

呢次肥師奶放幾耐？睇睇憲報真係嚇一跳，竟然係由今個月二十一號，放到八月二十九號返工，計吓數又係放超過一個月，等如放晒成個暑假，呢個簡直係悠長假期，諗起都Happy。

充完電備戰東亞運

老實講，肥師奶之前忙住撲火，最先係新光戲院續租嘅問題，跟住又爆出東亞運動會缺水，民間籌款欠一大截，要四出揼人心口捐錢，搞咗幾個月先填晒氹，諗住可以放下心頭大石啦，點知又畀馬會扯住話要加賽馬日，啱啱先搞掂晒。

之前做到踢晒腳，斷氣咁滯，再加上東亞運喺十二月底舉行，到時肯定忙到飛起，咪使旨意有假放，可能係咁，所以肥師奶呢次把心一橫，狼死啲放長啲，充完電之後，再備戰東亞運。

肥師奶霸晒成個暑假，咁邊個咁黑仔要頂佢個位先？咪就係副秘書長Cathy朱曼鈴署任囉。話時話，Cathy專門去湊西九文化區管理局，依家要重請行政總監，遲啲西九又搞諮詢會，呢次肥師奶優哉游哉放假去，Cathy肯定要兩頭撲，做到成隻屐咁。

眼白白同暑假講Bye Bye，又要做埋肥師奶嗰份，但辛苦係有補償嘅。Cathy署任個多月，按規定署任嗰個月可以攞到肥師奶D8（首長級第八級）二十萬元薪酬，較本身D4級十六萬元薪酬，多四萬元落袋，聽落都幾和味。