香港出現第一宗疑似豬流感死亡個案，死者係菲律賓籍船員，同時感染豬流感同埋社區型耐藥性金黃葡萄球菌，致死原因有可能係豬流感。

當局話，本港正處於流感高峰期，依家指定流感診所嘅病人平均有兩成感染豬流感，每日有五十到八十人中招，顯示病毒喺社區仍然活躍。本港確診個案已經超過一千五百宗，出現咗至少六宗嚴重或危殆個案。雖然重症個案比例係千分之三，稍低於外國數字，但絕對唔排除再死人嘅可能性。

呢嗱，喺亞太區疫情最嚴重嘅澳洲，人口得二千幾萬，但確診患者已超過一萬一千人，至少有二十四名患者死亡。照咁計，香港好可能出現比依家嚴重得多嘅情況。如果食物及衞生局局長周一嶽主管嘅醫療衞生部門再懶懶閒，隨時可能重演六年前「沙士」嘅悲劇。

疫情發展不容樂觀，但望吓條街，擔遮擋太陽嘅，絕對多過戴口罩防豬流感嘅人。好明顯，政府對疫情進一步惡化未做好充分準備，宣傳教育又唔足夠，好多市民已經放鬆咗警覺。一旦疫情出現突變，好似病毒出現變種、對特效藥產生抗藥性咁，後果不堪設想。

叮！政府淨係識做騷，抗疫有頭威冇尾陣。豬流感啱啱殺到嗰陣，為咗扮「抗疫英雄」，下下矯枉過正，尤其係高調隔離灣仔維景酒店嗰場大龍鳳，出齊架生，對住鏡頭鬼咁大陣仗，但實際上防疫甩甩漏漏，結果豬流感好快就攻陷社區，呢次仲出埋疑似死亡個案添。

至弊班衞生高官既冇吸取教訓，又唔去「執漏」，畀豬流感病毒攻陷城池都唔知驚，「控疫」搞唔掂就話「緩疫」，實際上係「緩役」，乜都唔使做。好似招標訂購疫苗咁，連世衞總幹事陳馮富珍都質疑快速生產豬流感疫苗嘅功效，周一鑊仲未搞清楚安全性，就話要去「搶貨」，睇怕啲公帑都凍過水咯。

叮！最搞笑就係，政府前幾日獲立法會財委會撥款近三億，畀五個部門加強改善環境衞生，話對抗豬流感喎。之不過，呢筆錢原來只夠用一年，咁咪又係做騷！今次搞掂淤塞排水渠，整乾淨公眾街市、公廁同後巷，一年之後又翹埋雙手，關人個關。即係翻叮沙士之後嗰個「全城清潔行動」囉，做完騷咪又係通街衞生黑點。

周一鑊抗疫當做騷，可能演技了得，早排仲獲頒金紫荊星章添。依家疫情擴散，仲搞到懷疑死人咁大鑊，太一叮睇怕要「頒」個大聲公畀佢，罰佢戴住個荷蘭水蓋企喺街邊大嗌，提醒市民「豬流感嚟啦！」叮！