煲呔曾尋日仲發大佢嚟講，七情上面咁話無論坐勞斯萊斯抑或係基層，貧同富有都要面對吸毒問題，講到好似吸毒無疆界咁，不過，仲誇張嘅喺後頭。

話說佢朝早會見十八區區議會正、副主席，有與會者引述席間有區議會主席發言時提到「軟性毒品」同「吸毒人士」等字眼，煲呔曾突然長毛上身，冇禮貌插嘴打斷人哋發言不特止，仲嚴詞厲色咁話：「乜嘢叫軟性毒品？毒品就係毒品，吸毒就係道友，唔好講得咁好聽！」佢又話美化名詞只會吸引更多年輕人吸毒。

相信大家仲記得煲呔曾早前出席立法會答問大會時，畀班議員狂攻下，佢發老脾爆出句「狗噏」，事後政府新聞稿就寫成「鬥噏」，咁又係咪美化自己呀？呢啲咪係有口話人，冇口話自己囉！