17/07/2009

播放本新聞相關短片

政情:最低工資商界議員玩拉布

早前都講過最低工資條例草案委員會成為新戰場,正反陣營傾巢而出爭奪主導權,依家令委員會人數高達三十六人,其中工商專業界有十二個,勞工界有七人,如以政治光譜劃分,建制派同泛民主派形成二對一之比,形勢都幾懸殊。

委員會尋日開會,結果由擁有工聯會背景嘅譚耀宗做主席,競選時承諾撐最低工資嘅會計界陳茂波任副主席,建制派都算小心,見副主席有機會代替主席主持會議,就連呢個機會都唔畀泛民,工商界對呢嗰組合相當放心。

工商專業界議員疊友入委員會,但唔代表佢哋好恨開會。喺傾下次開會日期,勞工界同泛民要求七月尾開波,九月初叫官員嚟交代立法內容,但多名商界代表就話八月、九月多議員外遊叉電同考察,不如十月至開會,一氣呵成;飲食界嘅張宇人直頭講十月好多慶祝活動,不如過咗十月先開會啦。咁都得?商界擺明想玩拉布,拖得幾耐得幾耐。