七一遊行前環保團體「綠色和平」四名成員潛入政府總部西座，喺外牆掛上巨幅「氣候逃犯」曾蔭權嘅通緝令，之後參加七一遊行部分市民留喺政府總部唔肯走，行政署玩落閘，禁止任何人出入，累及西座工作嘅立法會議員助理冇得放工，議員於是去信投訴。
行政署署長麥綺明尋日親身出席立法會行政管理委員會會議，向受影響嘅議員同議員助理道歉，承認當日嘅安排不周全，並向議員提供一個二十四小時緊急電話，寫包單一定有職員接聽。因呢啲突發事件，行政署亦收緊政府合署西座出入口保安，相當擾民。麥綺明承諾會逐步放寬政府總部出入安排，只係登記身份證就入得嘞喎！
