旅遊業議會時不時就畀人篤權力過大、透明度低，同埋委員清一色係旅行社東主，圍內玩晒！心水清嘅都知呢單嘢發起人係立法會旅遊界議員謝偉俊，舊年佢爆冷打低有富貴黨撐腰嘅議會總幹事董耀中當選，即刻拋出取締旅議會嘅建議，又同議會主席何栢霆喺議會會議旁聽員身份上爭拗，早有牙齒印。
尋日喺立法會又搵埋班志同道合嘅業界代表，吓吓啄住董、何不特止，又拉埋喺富貴黨分家嘅經濟動力胡兆英落水，話佢年底出嚟選主席，揶揄旅議會已被某政黨政治侵蝕。
最後葉劉淑儀動議要求重新檢討旅議會工作，謝偉俊當然和應，富貴黨嘅方剛快閃，白鴿黨李華明又唔見咗人，剩番八名議員在場；雖然建仔嘅李慧琼一語道破，話件事已淪為政治角力，但佢同陳鑑林都投支持票，加埋其他黨派附和，動議獲通過。莫非大家都槍頭對準富貴黨？