豬流感喺社區擴散，家庭醫學專科醫生李國棟喺診症時都多次遇過豬流感個案，佢尋日出席一項活動後話豬流感疫情發展到呢個地步，即使病人有輕微流感徵狀都毋須進一步檢驗，已將豬流感視作普通流感，而佢亦冇特別防禦措施，只係診症時戴口罩，返屋企就立即沖涼殺菌。
有人話豬流感不及○三年沙士咁嚴重，連防禦措施都冇得比，李醫生都好有同感。佢憶述○三年沙士爆發，大家都唔知道究竟係乜嘢病症，為咗家人安全起見，佢入住中環麗嘉酒店兩個月自我隔離，期間只係間中同太太見吓面。佢仲話酒店喺沙士期間生意慘淡，連同佢在內只租出七間房，減價後一晚房租只係幾百元，好抵住！
