17/07/2009

播放本新聞相關短片

政情:五散人『你估我唔到』

今屆立法會多咗好多獨立建制派議員,唔少政府高官都埋怨佢哋嘅投票立場好難估,成日要等到投票前最後一刻先揭盅,令佢哋好難箍票同數票,當中首推俗稱「五散人」嘅五名獨立議員。

五散人疑似召集人會計界嘅「波波」陳茂波尋日直認經常同政府玩猜謎語,到最後一刻先表明投票立場,例如日前嘅迪士尼撥款,由於佢曾經公開炮轟有關撥款安排,令政府以為佢就算唔投反對票都會投棄權,點知最後佢投咗贊成。但佢強調咁做純粹係想盡量聽多啲意見同諗得周詳啲,唔係有心吊高嚟賣或玩政府。

除咗玩殘啲高官外,波波有時連立法會同僚都玩埋。早前佢喺平反六四動議上發言,聲淚俱下咁譴責流血鎮壓,又同泛民主派一齊企起身為六四死難者默哀,但到最後一刻投咗棄權票,令建制派同泛民都大嘆估佢唔到。

波波為自己辯護,話事後收到嘅絕大部分意見都讚佢做得好恰當,西環亦冇搵佢秋後算帳,但佢亦因而收到有生以來第一封恐嚇信,鬧佢係民族罪人,仲話要佢死無全屍,最後搞到要報警處理。

享受鬆散運作模式

由富貴黨分裂出嚟嘅「3L」,最近已正式命名為「經濟動力」,咁五散人有冇計劃正正經經起番個朵同發大嚟搞?波波承認有傾過,但大家都好珍惜同享受依家嘅鬆散運作模式,冇計劃大幅改變,唯一改動係來年會互相夾吓加入乜嘢委員會,以免太過重複,慳番啲時間同精力。

佢仲透露曾有人開玩笑咁建議改名做「散餐派」,以示佢哋同乜嘢人都可以一齊食飯傾偈,以餐飲餐食餐餐清嘅模式合作,但由於呢個名有另一個唔多好嘅含意,最後都冇採納到。

波波講到明五散人享受「食散餐」同「你估我唔到」嘅運作模式,咁即係話佢哋喺未來一年會繼續同政府玩蠱惑骰,玩殘班高官。