估唔到，今時今日香港居然仲有啲咁蠢嘅官員。食物環境衞生署因為管理不善，部分街市空置率長期高企，前排畀審計署同立法會政府帳目委員會狂炳。食環署可能學精咗，呢次唔敢死撐，仲話會改善添。之不過，個「改善方案」毒過毒酒，叫「攞命方案」仲貼切啲。

呢嗱，食環署建議分階段向街市檔戶瘋狂加租，諗住六年內收番市值八成嘅租金。有幾瘋狂？有啲檔主第一年就要加租十二倍，由依家月租唔夠百二蚊加到千五蚊左右；加到第六年，月租估計超過九千蚊，累計加幅達到七十五倍，你話係咪狼過打劫先？

其實，為咗善用公帑，保障納稅人利益，街市加租無可厚非，但一定要加得其所，等市民心服口服。依家全港一萬一千幾個公眾街市租戶入面，繳交市值八成以上租金嘅唔到三成五，再加上非法分租、高空置率、收唔番冷氣費呢一連串問題，食環署每年要為街市營運倒貼超過一億公帑。

叮！一睇呢盤爛數，係人都知癥結係管理不善，唔係點會蝕到攤攤腰吖？既然係咁，首先要改善嘅梗係管理啦，冇理由本末倒置，靠瘋狂加租掠水㗎。食環署如果唔加強監管，唔改善環境，任街市通地垃圾，老鼠周圍走，啲攤檔依家咁平租已經十室九空冇人吼，再加幾倍甚至十幾倍租，搵阿茂去租咩？

食環署諗條咁嘅屎橋出嚟，唔使審梗係為咗有功課交，敷衍審計署、立法會同全港市民。請問署長卓永興，你有冇用過腦㗎，就算唔識「飲鴆止渴」，都知道乜嘢叫「殺雞取卵」啩？係咪要等街市一間執完又一間至安樂吖？

叮！食環署做嘢捨難取易，淨係識閉門造車。好似大埔同北區兩個街市咁，佢哋上個月為咗減少空置率，病急亂投醫，冇諗清楚街市環境適唔適合，就推出一共二十五個檔位畀小食同服務行業競投，結果九成檔位因為冇人吼要收番。

要街市有吸引力，最緊要環境企理。但係食環署官員一向當公帑唔係錢，對街市闊佬懶理，環境愈差愈冇人嚟，人流愈少愈無心打理。好似旺角街市咁，全港最旺嗰區嘅街市，空置率竟然超過六成。梗係啦，有條扶手電梯壞咗幾年都冇人去修理，想人哋入去幫襯，好難咯！

叮佢個鎯鎯！食環署有心甩包袱，無心搞好街市。人哋做生意鋪鋪賺，佢哋經營街市就鋪鋪勁蝕；唔諗點樣改善環境同管理，一味掛住向租戶收市值租金。咁搞法，六年之後收番市值八成租金就咪使旨意嘞，到時八成街市執笠就有份！