全國政協委員阿Ann蔣麗芸尋日出席所屬政黨茶敍，介紹黨內婦女事務委員會嘅新委員。嚟緊有乜新搞作？佢話呼籲姐姐妹妹站起來，既要學識愛自己，亦要熱愛生命同地球喎！
阿Ann本身係博士學生，「沙紙」多到貼滿屋，但為咗提升生活品味，兩個月前攞咗三萬港紙出嚟，上網報讀英國牛津大學一個教你如何欣賞維多利亞式建築設計嘅貴價暑期班，一心想體驗吓歐洲文化氣息，課程只得三個禮拜，收費絕對係五星級。
點知全球經濟受金融海嘯影響，呢類高檔課程「拍烏蠅」，校方近日通知佢，因為收生不足開唔成班，搞到佢做牛津學生夢碎！
事已至此，阿Ann惟有疊埋心水跟黨友考察珠海，八月再跟班政協考察貴州。佢又自爆近日秘密練兵，嚟緊同班婦協阿太喺八月二十八號粉墨登場表演，婦協主席林貝聿嘉會帶住班阿太表演打山西鼓，而佢仲大賣關子話會反串做古裝喎！