副局長中，環境局嘅潘潔、政制及內地事務局嘅譚志源、財經事務及庫務局嘅梁鳳儀（連政助伍潔璇）、民政事務局嘅許曉暉（連政助徐英偉），同運輸及房屋局嘅邱誠武，無論答案、格式、內容幾乎倒模一樣，政治化妝都慳番，納稅人年花千萬請佢哋做政治工作，係咪等如倒錢落鹹水海先？食物及衞生局副局長梁卓偉同政助陳智遠就識得重新剪裁吓啲格式，有小學勞作堂嘅水準，但答案亦跳唔出「標準答案」嘅框框。

有個別政助就打電話回話，教育局政助楊哲安答點解少咗落立法會時，話初期有主動要求列席，後來見冇發言權，所以改去見教育團體，仲自爆只會搵政黨核心傾偈。