煲冬瓜水皮 纜車變爛車

苦嘅係乜？首先係煲冬瓜水皮囉！佢話去到三碌拎初期，有時要用煲冬瓜回應，但係「纜車」好難發音，每次講親纜車就變咗「爛車」。咁又難怪佢咁介意嘅，佢調去三碌拎前，就因為有車廂跌咗落嚟，變成爛車，而佢又開口埋口「爛車」，簡直係開口夾着脷，都唔知係攞景定贈興。

以前佢喺港鐵匿埋做嘢，但喺三碌拎就唔同咯，連佢都話自己做嘢咁耐，未試過好似過去兩年多咁高曝光率。呢樣真係好難分辨係開心定係心噏，事關曝光率高未必係好事，好多時甚至係壞事，就因為好多嘢衰咗，先要頻頻出嚟解畫，三碌拎有辦你睇，真係有苦自己知，佢仲話希望將來唔會有同樣嘅情況喎！

梗係啦！遲啲佢返娘家做嗰份工，但凡港鐵車廂同開新站事宜，甚至訊號系統都關佢事，本來就唔多使出嚟拋頭露面，可以話唔使見光，若果曝光率高嘅話，都唔慌係好嘢！到時就算佢着晒防曬同防光嘅保護衣，都遮唔到光呀！

咁有乜開心嘢？佢話喺纜車重開前，心情戰戰兢兢，雖然事前做咗好多推廣，但人算不如天算，客人嘅諗法又無法估計，點知重開嗰日，有兩個學生仔為咗霸頭位坐纜車竟然去車站紮營，最估唔到係連當初誓死唔肯踏足纜車站半步嘅一班寶蓮寺僧人（即係寶蓮寺釋智慧大和尚）都去撐場，真係令佢又驚喜又感動。講到呢度，佢好感觸咁話：「能夠挽回市民信心，對我自己同公司都好重要！」