呢嗱，話說有個黃婆婆今年四月初因為「生蛇」入廣華醫院求醫，喺留院治療初期，病人兒子見到阿媽神志不清，甚至唔願落床，家人見唔係好妥，於是向院方追問母親嘅病情。點知唔問猶自可，一問之下，該院至死死氣咁承認有醫護人員打錯針，搞到黃婆婆迷迷糊糊。

廣華醫院指出，醫生本來為病人處方利尿藥、嗎啡作靜脈注射，但護士有嗎啡唔拎，竟然拎咗隻鎮靜劑幫病人注射，直至護士長喺第二日凌晨檢查危險藥物櫃時先至知道出事。

有冇搞錯呀！打錯針已經夠晒離譜㗎啦，仲要喺醫護人員擺烏龍之後，粒聲唔出當冇事發生，如果唔係病人家屬問一問，都唔知會隱瞞到幾時。

叮佢個鎯鎯，呢次大話夾好彩打錯鎮靜劑，婆婆可以大步檻過，如果打錯其他藥物，隨時命都冇埋呀！嗱嗱嗱，威爾斯親王醫院試過發生打錯針事件，有個患血癌嘅少女小琳就冇咁好彩，打錯咗化療針白白冇咗條命。

咁又奇怪喎，乜醫管局唔係話為咗減少藥物事故，公立醫院醫護人員為病人注射或喺病房派藥畀病人時，有一套簡稱「三核五對」嘅程序咩？

所謂「三核五對」，「三核」係指喺藥櫃取藥時、喺藥袋取出藥物時同埋將藥物放回藥櫃時三個步驟。再喺每個步驟核對五項資料，分別核對病人姓名、藥物名稱及劑型、藥物劑量、藥物使用時間以及藥物使用嘅途徑，咁就為之「五對」。

照計有咗「三核五對」，應該可以確保唔會令病人食錯藥或打錯針，亦可防止藥物使用後畀人亂咁放，令其他醫護人員因先前有某個步驟出錯而一錯再錯。咁因乜事有咗呢個睇嚟密不透風嘅指引，依然有咁多藥物事故發生呢？

鬼咩，指引冇錯係放咗喺度，但醫護人員跟唔跟住做到足，係另一回事。嗱，今次涉事兩名護士，已經坦白向院方認咗冇跟足程序做啦，可見「三核五對」根本係形同虛設。

不過話時話，就算搞錯又點？畀人求其警告兩句就算，又唔使炒魷嘅，試問點會有阻嚇力吖？冇計啦，正所謂上樑不正下樑歪，劑劑有醫療事故，你有冇見過食物及衞生局局長周一嶽會出嚟當眾掌摑自己，再引咎辭職吖？當然冇啦，周一嶽做埋咁多衰嘢，仲拎埋荷蘭水蓋，你又吹得佢脹咩？

叮佢個鎯鎯，公立醫院醫療事故多籮籮，仲話醫療係香港六大優勢產業之一？唔好笑大人個口。計太一叮話齋，一日唔叮走周一嶽，打錯針可以同輸錯血、割錯乳房、過期藥、發霉藥以及見錢得救合稱為「六大靠害醫療事故」！