煲呔曾尋日入大埔做禁毒騷，下晝兩點十分，佢坐住座駕駛過中環長江中心對出嘅電車路，點知幫佢開路嘅一架交通警車突然跣胎，瞓咗喺條街度。警方發言人證實，當時開路交通警正沿德輔道中西行，同一架相反方向前行嘅電車發生輕微碰撞，冇人受傷，肇事原因仍在調查當中。當時煲呔曾座駕緩緩從後駛過，坐喺後座嘅煲呔曾只係隔住窗睇熱鬧，反而電車司機即刻落車扶起交通警。
就喺開路鐵騎跣胎前一粒鐘，港大公布民調顯示煲呔曾嘅支持度再度急瀉，支持佢出任特首嘅比率為四成，跌咗五個百分點，反對率為四成五，升六個百分點，係佢上任特首以嚟嘅新高。港大民調呢頭公布完佢民望急跣胎，嗰頭佢就喺中環遇上交通警罕有跣胎事故，都咪話唔信邪！
跟住佢入大埔做騷又出現蝦碌場面。社工安排咗六位參加咗運動社區發展計劃嘅年輕人同佢傾偈，其實呢班後生仔只係平日沉迷打機，成績較差兼同父母關係欠佳，但煲呔曾當正佢哋係曾沉淪毒海，叫大家將脫離毒海嘅經驗，同身邊同學分享，搞到成班後生仔夾硬啃咗濫藥呢隻死貓。