日前白Sir出席一個酒會，又再畀人追問身世，佢不厭其煩咁話：「白姐姐係廣西人，我係福建安溪人，我哋唔同鄉下。」都講得好白咯呵，兩個人嘅鄉下相差十萬八千里，即係大纜都扯唔埋，就算滴血都唔會混埋一齊啦，又點會係兩姐弟？白Sir話自己係百分百福建人，只不過生於香港，但到依家都未返過鄉下。

話題一轉，問佢點睇近日公仔箱熱播以入境處為題嘅電視劇集，佢諗咗一陣話：「收貨喇！」原來劇集開拍前，曾經同白Sir打過招呼，得入境處同意先拍得。

睇怕白Sir忙到連睇電視都冇時間。講起暑假去邊度充電，佢扁晒嘴咁話：「邊度都唔敢去喇，老闆（保安局局長李少光）都唔放假，我又點敢放假呢。」