一般草案委員會冷清

勞工界同商界對最低工資一直爭持不下，呢個現象睇嚟會喺最低工資條例草案委員會延續落去。平時一般嘅草案委員會，由於涉及複雜煩瑣嘅立法條文問題，記者少採訪、少報道，議員見曝光機會低，除咗特首選舉同《基本法》二十三條呢類高度敏感嘅草案，一般開會都冷清清，今次高達三十三人簡直係異數。

睇番委員會份暫定委員名單，三十三個委員大致可以劃分成四大陣營，嚟自左中右陣營嘅勞工界幾乎空群出動，加埋走基層路線嘅議員佔九個，商界背景嘅亦有九個，總商會代表林健鋒、工業總會代表梁君彥同廠商會代表林大輝，全部列將陣前，雙方冧晒友、紮行馬，擺明想搶奪委員會嘅制空權，為背後支持者爭取最大權益；其他嘅，民主派同建制派都爭相冧友，睇嚟都係睇中呢個議題夠熱爆。

有勞工界議員透露，勞工同商界對委員會嘅主席人選肯定各不相讓，現時兩邊陣營人馬相若，勢均力敵，最終邊個掌帥印？極有可能會由立場相對中立、同時為兩邊陣營接受嘅議員出任主席，做過工聯會前副會長嘅譚耀宗係最有可能嘅人選之一，而論實力，泛民主派亦反對唔嚟。

直至尋日午夜十二點前，議員都可以報名加入委員會，最終可能唔止三十三人，呢台戲認真熱鬧。