呢嗱，議員陳鑑林指淫審處目前司法同埋行政合於一身做法唔妥當，仲舉例話有報章受到不公平對待，同一張圖片，一份報章受罰，但另外一份就若無其事，咁會削弱淫審處公信力。

咁咪係囉，好似外國女星Kelly Brook 性感照事件咁，《東方日報》同《太陽報》照足規矩打格仔先至刊出，被評為二級不雅；但《蘋果日報》就被評為一級非不雅，擺到明係雙重標準㗎啦。但咁都未夠喎，淫審處買二送一，嚟多個三重標準呀。叮佢個鎯鎯，一本香港有售嘅外國雜誌《NOW》，冇遮冇掩就咁登出裸照，嘿，居然連送檢同評級都唔使喎。呢個鬧劇荒謬絕倫成咁，真係夠晒經典，難怪引起全港市民激烈回響，狠批當局刻意放生爛果報以及選擇性執法。

不過對於當局周不時對唔同嘅傳媒採取唔同嘅標準，告一間唔告一間，太一叮都唔覺得奇怪。鬼叫東方報業集團一直以來都義無反顧咁幫市民監察政府咩，成日畀人挖瘡疤，班高官梗係唔高興啦，唔針對正義傳媒就奇嘞。

至於因乜事當局成日放生壹淫媒呢？咁就唔多清楚咯，可能人哋有背景呢，又或者係人哋肯妥協啩。所以做正義傳媒都幾慘(口架)，為民喉舌換來無休止嘅政治迫害，而且花款多籮籮添呀！

嗱，年前《太陽報》登咗篇由「柳太極」撰寫嘅專欄文章，題為《對奸黨不必論理只須暴打》，識字嘅都知係遊戲文章啦。誰不知後尾大埔警署有幾個警務人員殺氣騰騰踩上報館，話文章「涉嫌鼓吹暴力」，要求提供上述「柳太極」文章嘅撰文者資料以及審批同類文章嘅機制，真係莫名其妙。

仲有個衞生署，平時有正經事唔去做，最叻利用《不良醫藥廣告條例》橫行霸道。例如同一個醫藥廣告登喺《東方日報》或《太陽報》就隨時被檢控，之但係登喺爛果報或者其他報章竟然乜事都冇，你話奇唔奇？

咁都唔算奇，爆一單秘密畀大家聽吓吖，有次當局諗到冇嘢好諗，索性連出晒名乾淨整潔嘅東方Canteen都搞，話要檢查一下衞生喎，卒之咪又係不了了之。有關當局一而再、再而三咁踩埋身，咁都唔係玩針對？三歲細路都唔信啦！

好嘞，講番淫審處畀議員狂炳單嘢，商務及經濟發展局常任秘書長栢志高又點死撐呢？唔知係咪熱到Short咗呢？佢居然鬼拍後尾枕同意淫審處組成係有問題，仲話局方將會同司法機關研究淫審處嘅職能。

叮佢個鎯鎯！唔使栢志高講都知淫審處立立亂而且勁有問題啦，佢餐餐都夾埋影視處包庇縱容壹淫媒，淫賤黎旗下刊物無論點樣發布淫褻及不雅物品宣淫販賤，影視處一係完全唔送檢，就算送檢又如何？其他刊物甚至有被評為三級，負責人要收監，但有淫審處把關，壹淫媒劑劑罰雞碎咁多錢了事。

計太一叮話齋，呢個《淫褻及不雅物品管制條例》再檢討落去都係嘥聲壞氣，查實最應該檢討嘅，係影視處同埋淫審處幾時摺埋，唔好再喺度篤眼篤鼻，無事生非呀！