食物及衞生局早前向立法會食物安全及環境衞生事務委員會建議撥款三億元，畀七個政府部門搞抗疫衞生措施，畀唔同黨派嘅議員炮轟做局長嘅周一鑊趁火打劫，將啲同抗疫冇關嘅開支項目質晒落去，例如畀錢漁護署加強清潔郊野公園同副食品批發市場、叫海事處加緊清潔海上垃圾等。有議員更威脅如果政府唔肯主動削減撥款額，可能會投票反對批錢。
立法會財委會今日討論有關撥款，唔見咗漁護署同海事處嘅開支分項，總額減至二億八千多萬元，雖然減幅只有百分之三點幾，但總算有減，唔少黨派都打算收貨。點知尋日有議員再詳細睇份撥款文件，先發現差啲中咗周一鑊嘅奸計，原來文件最尾一段最尾兩句提到，由於漁護署同海事處嘅開支款額都少於一千萬元，政府有權自行撥款推行，根本毋須財委會批錢，所以先冇擺落去。
有議員話嚴格嚟講周一鑊咁做並冇違規，但食衞局之前就撥款諮詢議員時，一直講係三億元撥款一筆過，臨門一腳先斬件分開計數，有博懵同走法律罅之嫌，即使佢哋唔會因而否決整項撥款，都會趁今日嘅會議鬧衰周一鑊呢個茅躉王！