私隱專員吳斌尋日公布一個發生喺○六年嘅個案，話一間連鎖式傢俬店收集四百幾個員工嘅指紋資料，用嚟登記員工嘅考勤紀錄，如果員工唔遵從就會被解僱，畀其中一位員工投訴；佢又摷番幾年前嘅年報出嚟講，話當時有兩單類似嘅個案，仲話收集個人資料一定要得到當事人同意，仲要小心保管搜集返嚟嘅資料。
跟住佢就打蛇隨棍上，話啲立法會議員成日鬧佢係冇牙老虎，佢都認同呢個講法，皆因佢要等到收到投訴後，先可以急急鑲番啲牙落去，出手叫呢啲違規公司改善做法。佢之前已經同政府講咗，要求加重違反私隱條例嘅罰則，咁先可以收阻嚇作用喎。
查實吳斌成日同人呻公署冇權又冇勢，只可以不斷向違規機構發出提醒同勸喻，之前已向政府表明希望盡快修改條例，容許公署有更大權力，佢今次冇事搵事嚟講，擺明又係炒冷飯啫。不過，呢招有冇效仲未知，但已經畀人覺得公署做嘢冇效率，幾年前嘅個案到依家先公布，隨時偷雞唔到蝕把米。