合和實業主席「哥頓」胡應湘近期喺合和嘅項目中少咗現身，大項目主要由佢乖仔、擔任合和聯席董事總經理嘅胡文新負責領軍。
哥頓尋日出席一個政黨經濟顧問小組嘅會議後話，自己年紀已經有番咁上下，加上阿仔搞得唔錯，令佢相當放心。老實講，近年合和喺香港嘅業務同埋台前工作，都由胡文新負責，哥頓就對內地業務比較有興趣。
胡文新前年將九龍國際展覽中心翻新，變成依家嘅EMax商場，咁啱紅磡體育館舊年大修，唔少演唱會都去咗EMax搞，依家紅館開番，Emax話咁快又變成有座位三千、專搞首映禮嘅場地，聽晚頭炮就有《哈利波特》放映會，唔少電影文化界中人都會畀面出席，唔知哥頓會唔會捧場呢？
