嚟自教育界嘅議員張文光發炮，話依家啲問責官員離職後如果再要出嚟做嘢，表面上係要經過委員會嘅批准，但係就算委員會唔批，只要班前高官堅持要出任新職，委員會都無可奈何要接受；跟住佢仲語出驚人，鬧成個制度根本冇約束力，同「蛋散」一樣咁易碎，矛頭直指由鄭慕智領導嘅前任行政長官及政治委任官員離職後工作諮詢委員會（下簡稱「委員會」）。

鬧完個制度，張文光又指現時社會有聲音要求問責官員同首長級公務員嘅離職就業安排要同步收緊，係唔實際嘅諗法，仲話「將呢件蛋散加固」添！

教育界代表小心教壞細路

因為本身問責官員嘅合約有啲條款係限定佢哋離職再就業，如果依家要收緊呢啲條款，都要等佢哋任期完結後先搞得。言下之意，最快都要等三年，就算張文光咁睇唔過眼，都要承認「蛋散要加固都有過程」。不過，就算最終可以延長問責官員嘅管制期，都改變唔到委員會冇約束力嘅事實，成個委員會只會繼續係「蛋散」。

咁「蛋散」究竟點解呢？專門研究香港本土文化嘅次文化堂社長彭志銘就話，「蛋散」係泛指啲低下同冇料到嘅人。其實，就連周星馳喺唔少電影都用「蛋散」嚟形容啲茄哩啡，相信張文光咁講，根本係鬧成個問責官員過冷河嘅制度，以至委員會都係冇料到囉。

呢屆立法會多次出現語言暴力，先有「poor guy」同「不該」滿天飛，惹起外界非議，依家連教育界嘅張文光都畀政府激到爆句「蛋散」。但嬲還嬲，佢始終係立法會教育界嘅代表，講埋呢啲嘢，因住教壞細路喎！